უეფა 2016 წლის ევროპის ჩემპიონატიდან 2 მილიარდი ევროს შემოსავალს ელოდება. ინფორმაციას Bloomberg-ი ავრცელებს. იმ შემთხვევაში თუ ევროპის საფეხბურთო ორგანიზაცია აღნიშნულ თანხას მიიღებს, უკრაინასა და პოლონეთში გამართული წინა ჩემპიონატის შედეგს გააუმჯობესებს.

2012 წელს უეფამ 1.4 მილიარდი ევრო მიიღო, თუმცა მაშინ გუნდების რაოდენობა საფრანგეთში გასამართ ჩემპიონატთან შედარებით 8-ით ნაკლები გახლდათ. ევრო 2016-ზე ბილეთების რაოდენობა 25%-ით გაიზარდა, ამავდროულად სპონსორების რაოდენობის 40%-იანი ზრდა დაფიქსირდა და უეფა ფინანსური მხარდამჭერებისგან 450 მილიონ ევროს მიიღებს.

ევროპის ჩემპიონატი დღეს, 10 ივნისს დაიწყება. გახსნით მატჩში საფრანგეთი რუმინეთს უმასპინძლებს. შეხვედრა თბილისის დროით სტარტს 23:00 საათზე აიღებს.