ევროპის 2016 წლის ჩემპიონატის პირველი 1/2 ფინალისტის ვინაობა ცნობილია. პორტუგალიის ნაკრებმა ძირითად დროში კვლავ ვერ იმარჯვა, თუმცა ამჯერად პენალტების სერიაში გაუმართლა და კონტინენტის ოთხ საუკეთესო გუნდში ისე მოხვდა, რომ ძირითად დროში არ მოუგია.

მწვრთნელებმა სიურპრიზები არ შემოგვთავაზეს და იმ შემადგენლობას დაეყრდნენ, რომელიც ნავარაუდები გახლდათ.

შეხვედრა პოლონელთათვის იდეალურად დაიწყო და მე-2 წუთზე რობერტ ლევანდოვსკიმ მიმდინარე გათამაშებაში პირველად და როგორც მოგვიანებით გაირკვა, უკანასკნელად გამოიჩინა თავი – მარჯვენა ფლანგზე სედრიკ სოარეშმა ითამაშა ცუდად, რომლის შეცდომით გროსიცკიმ ისარგებლა, ფლანგი გაარღვია და რობერტ ლევანდოვსკის დაასვა ბურთი, რომელმაც ახლო მანძილიდან შეძლო გატანა.

გაშვებული გოლის შემდეგ პორტუგალია განსაკუთრებულად არ გააქტიურებულა, თუმცა პირველ ტაიმში მაინც გაათანაბრა – 33-ე წუთზე რენატო სანჩესმა რიკოშეტის დახმრებით შორეული დარტყმით იხეირა.

გუნდებს ანგარიშის შესაცვლელად ძალიან ბევრი დრო ჰქონდათ, მაგრამ როგორც მიმდინარე ტურნირზე უმეტესად ხდება, არ რისკავდნენ და შესაბამისად, დარჩენილ დროში 100%-იანი საგოლე მომენტი არ ყოფილა.

პოლონელთაგან ყველაზე რეალური შანსი რობერტ ლევანდოვსკის ჰქონდა, რომელსაც პატრისიომ აუღო, ხოლო პორტუგალიელთაგან რონალდუს ჰქონდა შანსი, მაგრამ ააცილა. თუმცა, ამ მომენტებს ნაკლებად შეიძლება ეწოდოს 100%-იანი.

შეხვედრა დამატებით დროში გადავიდა, სადაც მომენტები თითქმის არ შექმნილა და გასაკვირი არაა, რომ გოლი არ გასულა. შესაბამისად, გამარჯვებულის გამოსავლენად კვლავ პენალტების სერია გახდა საჭირო.

საფეხბურთო ლატერეის ბედი კი, იაკუბ ბლაშჩიკოვსკის დარტყმამ გადაწყვიტა. გამოცდილი ნახევარმცველი მიმდინარე ტურნირზე პოლონელთაგან საუკეთესო გახლდათ, თუმცა პენალტების სერიაში არ გაუმართლა და სწორედ მას აჯობა რუი პატრისიომ, რამაც სერიის ბედი გადაწყვიტა და პორტუგალია 1/2 ფინალში გავიდა, სადაც უელსის და ბელგიის გამარჯვებულს შეხვდება.

პოლონეთი – პორტუგალია 1:1 (1:1) პენ. 5:4

მარსელი, “ველოდრომი”

სავარაუდო შემადგენლობები:

პოლონეთი (4-4-2): ფაბიანსკი, გლიკი, პაზდანი, იედრზეჟუკი, მაცინსკი (იოდლოვიეცი 98), კრიხოვიაკი, ბლაშჩიკოვსკი, გროსიცკი (კაპუსტკა 82), მილიკი, ლევანდოვსკი.
მწვრთნელი: ადამ ნავალკა

პორტუგალია (4-3-1-2): პატრისიო, პეპე, ფონტე, სოარეში, ელიზეუ, უ.კარვალიო (დ.პერეირა 96), რ.სანჩესი, ა.სილვა (მოუტინიო 73), მარიო (კვარეზმა 80), ნანი, რონალდუ.
მწვრთნელი: ფერნანდო სანტუში

გოლები: 1:0 ლევანდოვსკი (2), 1:1 რ.სანჩესი (33)
გაფრთხილებები: იედრზეჟუკი, გლიკი, კაპუსტკა – ა.სილვა, უ.კარვალიო
მსაჯი: ფელიქს ბრიხი