"მანჩესტერ იუნაიტედის" თავდამსხმელი მარკუს რეშფორდი ევროპის ჩემპიონატის ისტორიაში ყველაზე ახალგაზრდა ინგლისელი ფეხბურთელი გახდა. ინფორმაციას BBC ავრცელებს. "წითელი ეშმაკების" ფეხბურთელი უელსთან მატჩში მოედანზე 73-ე წუთზე გამოვიდა.

აქამდე ევროტურნირზე ინგლისის რიგებში ყველაზე ახალგაზრდა მოთამაშე უეინ რუნი გახლდათ. 2004 წელს თავდამსხმელი მოედანზე 18 წლის და 232 დღის ასაკში გამოჩნდა, რეშფორდი კი 18 წლის და 228 დღის გახლდათ.

რეშფორდი ლუის ვან გაალმა "მანჩესტერის" მთავარ გუნდში მიმდინარე წლის იანვარში დააწინაურა. პრემიერლიგაში, ევროპა ლიგასა და ასოციაციის თასზე მარკუსმა 18 მატჩი ჩაატარა და თავი 8 გოლით გამოიჩინა. აღნიშნული კარგი თამაშის გამო, ფეხბურთელმა ეროვნულ ნაკრებში თამაში დაიმსახურა.