რუსეთის და ინგლისის მატჩის დასრულების შემდეგ, "სტად ველოდრომზე" ორივე გუნდის გულშემატკივრები ერთმანეთს ფიზიკურად დაუპირისპირდნენ. აღნიშნული გაგრძელბა გახლდათ სტადიონის მიღმა მომხდარი ჩხუბისა. ფრანგულმა გაზეთმა L"Equipe-მა მარსელში განვითარებული მოვლენები ერთი სიტყვით შეაფასა: "სირცხვილი".

გაზეთის ცნობით, სტადიონის მიღმა მომხდარ დაპირისპირების დროს 16 ადამიანი დაშავდა, ხოლო მატჩის შემდეგ - 31. ასევე მოჩხუბარი გულშემატკივრების გაშველების დროს სამი პოლიციელიც დაზიანდა. საბოლოოდ სამართალდამცავებმა კი 8 ადამიანი დაიჭირეს.

მატჩის შემდეგ რუსეთის გულშემატკივართა გაერთიანების ხელმძღვანელმა განაცხადა, რომ ინციდენტი არ მომხდარა.

"არაფერი მომხდარა. ინგლისელთა სექტორის გულშემატკივრები წამოდგნენ და გარეთ გაქცევა დაიწყეს. პოლიციაც იქ იდგა და ყველაფერი კარგადაა. სამართალდამცავები კარგად მუშაობენ." - ციტირებს ალექსანდრ შპრიგინის სიტყვებს daily mail-ი.

საპირისპიროს აცხადებს რუსეთის სპორტის მინისტრი ვიტალი მუტკო. მაღალჩინოსნის თქმით, გულშემატკივრებს შორის ბარიერი არ არსებობდა და ინციდენტი დაბალი ხარისხის ორგანიზების ბრალია.