ხორვატიის ეროვნული ნაკრების კაპიტანი დარიო სრნა, ისევე როგორ მთელი გუნდი, ბრაზილიის ნაკრებთან მატჩში მსაჯთა მოქმედებით უკმაყოფილოა. ნიკო კოვაჩის გუნდის მარჯვენაფლანგელს მიაჩნია, რომ მსოფლიოს ჩემპიონატის გახსნით მატჩში, ფრედის წაქცევისთვის თერთმეტმეტრიანი არ უნდა დანიშნულიყო.
“2 წელიწადი მუხლჩაუხრელად ვმუშაობდით, აქ კი, ასეთი მსაჯობა დაგვხვდა. მიუხედავად ამისა, ყველას ვაჩვენეთ, რომ ბრაზილიისთვის კონკურენციის გაწევა შეგვიძლია. კარგად ვითამაშეთ და მომდევნო მატჩებსაც დიდი იმედით ვხვდებით.
მეამაყება, რომ ხორვატიის ნაკრების კაპიტანი ვარ. მატჩის ბედი მსაჯმა გადაწყვტა. ეს არ უნდა მომხდარიყო. მსოფლიოს ჩემპიონატს 2 მილიარდი ადამიანი უყურებს და ასეთი შეცდომები დაუშვებელია”, - განაცხადა სრნამ მატჩის შემდეგ.
შეგახსენებთ, რომ ბრაზილიის ნაკრებმა ხორვატები 3:1 დაამარცხა. ფრედის წაქცევისთვის, მსაჯმა ხორვატთა კარში არასამართლიანი თერთმეტმეტრიანი დანიშნა, რომელიც ნეიმარმა გოლად აქცია.
კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია