ესპანეთის ეროვნული ნაკრების მთავარი მწვრთნელი ვისენტე დელ ბოსკე ჰოლანდიასთან განცდილი მარცხის (1:5) შემდეგ იმედგაცრუებულია და აღნიშნავს, რომ გუნდმა ცივი შხაპი მიიღო.
"შეუძლებელია ეს წაგება ახსნა, თავს ცუდად ვგრძნობ. ზოგადად დაცვაში მეტოქესთან შედარებით უფრო ძლიერები უნდა ვყოფილიყავით, მაგრამ როგორც დაცვაში, ისე მოედნის ყველა წერტილში სუსტად გამოვიყურებოდით. ჩვენ ვერ მოვიგეთ, თუმცა შოკიდან უნდა გამოვიდეთ და წარმატებას კვლავ მივაღწიოთ." - განაცხადა მატჩისშემდგომ პრესკონფერენციაზე იმედგაცრუებულმა ესპანელმა სპეციალისტმა.
ვისენტე დელ ბოსკემ მეორე ტაიმში იკერ კასილიასის უსუსური თამაში არ გააკრიტიკა:
"განვლილი მატჩი რომელიმე კონკრეტული ადამიანის გამო არ წაგვიგია და იკერს არც დავადანაშაულებ, რადგან მარცხი მთელი გუნდის ბრალია."
შეგახსენებთ, რომ ესპანეთის ეროვნულ ნაკრებს, ჰოლანდიასთან მატჩამდე, 4-ბურთიანი სხვაობით ბოლოს, 1963 წელს შოტლანდიასთან ამხანაგურ მატჩში ჰქონდა წაგებული - 2:6.