ყველას გემახსოვრებათ 2010 წლის მსოფლიო ჩემპიონატის ფინალი, სადაც ესპანეთის ეროვნულმა ნაკრებმა ჰოლანდია დაამარცხა და სანუკვარ გამარჯვებას მიაღწია. ჰოლანდიელთა შემტევი არიენ რობენი მიიჩნევს, რომ "ფურია როხასთან" პარასკევს მოგებული შეხვედრა წინა მუნდიალის ფინალის რევანში არ ყოფილა.
"ბედნიერნი ვართ და ჩვენი ახალგაზრდული გუნდით ვამაყობ. ეს შეხვედრა ჯგუფური ეტაპის იყო და რევანში არ აგვიღია. 2010 წელს ფინალი ვერ მოვიგეთ, თუმცა გასულ შეხვედრაში ჩვენი სიძლიერე დავამტკიცეთ. ამ გამარჯვებამ უფრო მეტი მოტივაცია შეგვმატა, თუმცა ეს მხოლოდ დასაწყისია და არ უნდა მოვეშვათ. ხვალიდან ავსტრალიის წინააღმდეგ მატჩისთვის მომზადებას განვაგრძობთ." _ განაცხადა მატჩის შემდეგ გახარებულმა რობენმა.
შეგახსენებთ, რომ არიენ რობენმა 52-ე წუთზე ჰოლანდია დააწინაურა (2:1), ხოლო მე-80 წუთზე ესპანელთათვის გამანადგურებელი ანგარიში 5:1 დააფიქსირა.