კოლუმბიის ეროვნული ნაკრები სამხრეთ ამერიკის კონტინენტის წარმომადგენელთაგან მესამე ჩაერთო მსოფლიოს ჩემპიონატში და ბრაზილიისა და ჩილეს მსგავსად, ჯგუფური ეტაპი გამარჯვებით გახსნა, ოღონდ თუ მუნდიალის მასპინძლებმა და ჩილელებმა 3:1 მოიგეს, ხოსე პეკერმანის გუნდმა კიდევ უკეთესი ანგარიშით – 3:0-ით მიაღწია საწადელს.
კოლუმბიელებმა ძლიერი დაცვის ხაზით თავმომწონე ბერძნების კარი პირველივე შეტევით აიღეს – მე-5 წუთზე მარჯვენა ფლანგზე “ფიორენტინელმა” ხუან კუადრადომ ხოსე ჰოლებასს აჯობა და ბურთი საჯარიმოში შეაგორა. იქ კი ყველას შეტევაში ჩართულმა მარცხენა მცველმა პაბლო არმერომ დაასწრო. მისი არც თუ ძლიერი დარტყმის შემდეგ ბურთი კოსტას მანოლასს მოხვდა და მეკარისგან მარჯვენა კუთხეში შეგორდა.
საბერძნეთს სულ რაღაც ერთ წუთში შეეძლო გათანაბრება, მაგრამ პანაიოტის კონემ დაახლოებით თერთმეტმეტრიანის ნიშნულიდან კარს სანტიმეტრებით ააცილა. მთელი პირველი ტაიმის განმავლობაში ბურთს უკეთ ფერნანდო სანტოსის შეგირდები აკონტროლებდნენ, მაგრამ მათი შეტევები ძირითადად მეტოქის საჯარიმოს მისადგომებთან სრულდებოდა ხოლმე.
რეალური შანსი ევროპელებს მხოლოდ ორჯერ მიეცათ. 28-ე წუთზე ჰოლებასის ჯარიმის შემდეგ ვასილიოს ტოროსიდისმა მეორე სართულზე ყველას კი აჯობა, მაგრამ დარტყმისას სიზუსტე დააკლდა. ზედ შესვენების წინ კოლუმბია მეკარემ გადაარჩინა – დავიდ ოსპინამ კონეს შორეული ძლიერი დარტყმა ლამაზი ნახტომით მოიგერია.
მეორე ტაიმიც “ელინების” კარნახით დაიწყო, მაგრამ გოლი კვლავ მათ კარში გავიდა –კუთხურის შემდეგ აბელ აგილარმა ბურთს მიმართულება შეუცვალა, კარის ხაზისკენ გადაგზავნა, იქ კი ტეოფილოს გუტიერესმა იყოჩაღა და საფინალო სირენამდე ნახევარი საათით ადრე თამაშის ბედი თითქმის გადაწყვიტა.
საბერძნეთს ეგებ მინიმუმ ქულის გადარჩენა მაინც მოეხერხებინა, ორი ბურთით ჩამორჩენიდან რამდენიმე წუთში, ტეოფანის გეკასს ურეალურესი მომენტი რომ არ გაეცუდებინა – თურქული “ქონიას” თავდამსხმელმა ორიოდ მეტრიდან ბურთი ხარიხას გაარტყა. ტაიმის შუაწელს კოსტას მიტროღლუს შორეული გასროლა მცველს ხელზე მოხვდა, მიმართულება შეიცვალა და კარს ასცდა. მსაჯმა წესების დარღვევა არ დააფიქსირა და ბერძნებს მხოლოდ კუთხური აკმარა. ერთი ხელსაყრელი შანსი გიორგოს სამარასმაც ვერ გამოიყენა. წერტილი კი შეცვლაზე შესულმა ჯეიმს როდრიგესმა დასვა, მსაჯის მიერ თამაშისთვის დამატებულ მე-3 წუთზე – სამხრეთამერიკელებმა ცენტრში სწრაფად გაათამაშეს ბურთი და მატჩის ბოლო შეტევა ორესტის კარნეცისის კარის მესამედ აღებით დააგვირგვინეს – 3:0.

ბელუ-ორიზონტი
კოლუმბია – საბერძნეთი 3:0 (1:0)
კოლუმბია: ოსპინა, სუნიგა, იეპესი, საპატა, არმერო (არიასი 74), აგილარი (მეხია 69), სანჩესი, როდრიგესი, კუადრადო, იბარბო, გუტიერესი (მარტინესი 76).
მწვრთნელი: ხოსე პეკერმანი.
საბერძნეთი: კარნეცისი, ტოროსიდისი, პაპასტატოპულოსი, მანოლასი, ჰოლებასი, კონე (კარაგუნისი 78), მანიატისი, სამარასი, კაცურანისი, სალპინგიდისი (ფეტფაციდისი 57), გეკასი (მიტროღლუ 64).
მწვრთნელი: ფერნანდო სანტოსი.
გოლები: 1:0 არმერო (6), 2:0 გუტიერესი (58), 3:0 როდრიგესი (90+3).
გაფრთხილება: სანჩესი (26), პაპასტატოპულოსი (52), სალპინგიდისი (55).