პორტუგალიის ეროვნული ნაკრების თავდამსხმელი კრიშტიანუ რონალდუ 16 ივნისს გერმანიის წინააღმდეგ მატჩში მონაწილეობას მიიღებს.
ევროპულმა სპორტულმა საიტებმა, პორტუგალიელთა მეკარის, ედუარდოს ინტერვიუ გაავრცელეს, რომლის თანახმადაც, "ბრაგას" კარის დარაჯი რონალდუს 100%-იან მზადყოფნას ამტკიცებს.
"რონალდუ კარგადაა, სრული დატვირთვით ვარჯიშობს და მომავალი მატჩს 100%-იანი მზადყოფნით შეხვდება. პორტუგალიას ბევრი კარგი ფეხბურთელი ჰყავს და კრიშტიანუსთან ერთად გუნდი უფრო უკეთესია." - განუცხადა ედუარდომ ჟურნალისტს.
შეგახსენებთ, რომ მსოფლიოს საუკეთესო ფეხბურთელი 12 ივნისს, ვარჯიშზე, მუხლის ტრავმამ შეაწუხა და მოედანი ყინულის სახვევით დატოვა. ამის შემდეგ რონალდუს მონაწილეობა გერმანიის წინააღმდეგ გასამართ მატჩში ეჭვქვეშ დადგა, თუმცა თუ ედუარდოს დავუჯერებთ, თავდამსხმელი მომავალ შეხვედრაში ითამაშებს.
შეგახსენებთ, რომ გერმანიის და პორტუგალიის ეროვნული ნაკრებების დაპირისპირება 16 ივნისს, თბილისის დროით 20:00 საათზე დაიწყება.