1950 წლის შემდეგ, “მარაკანაზე” მსოფლიო ჩემპიონატის მატჩი პირველად 15 ივნისს ჩატარდება და ამ ისტორიული მოვლენის მომსწრე, პლანეტის სხვა მასმედიის საშუალებებთან ერთად, გაზეთი “მსოფლიო სპორტი” და საინფორმაციო სააგენტო worldsport.ge-ც არიან.
ფიფას მიერ მსოფლიო პირველობისთვის ჟურნალისთვის გაცემული საერთო აკრედიტაციის გარდა, ყოველ მატჩზე დასასწრებად სპეციალური მედია ბილეთია საჭირო. არგენტინა - ბოსნიის შეხვედრისთვის კუთვნილი ბილეთის ასაღებად რეკონსტრუირებულ “მარაკანაზე” დილიდან გავემართე.
მედიისთვის გამოყოფილ საგანგებო შესასვლელში მეტალოდეტექტორით შემოწმებას გადიხარ და მედია ცენტრში მხოლოდ ამის შემდეგ ხვდები. ბილეთი უპრობლემოდ ავიღე და ჯგუფურ ეტაპზე “მარაკანაზე” ამის გარდა, კიდევ სამ თამაშს დავესწრები: ესპანეთი – ჩილე (18 ივნისი), ბელგია-რუსეთი (22 ივნისი) და საფრანგეთი –ეკვადორი (25 ივნისი). პლეი ოფების მედია ბილეთების მისაღებად, ჯგუფური ეტაპის დასრულების მერე, ფიფაში განაცხადი ცალკე უნდა გააკეთო.
“მარაკანაზე” დილიდანვე ხალხმრავლობაა. ყველაზე მეტი არგენტინელი გულშემატკივრები არიან. ჩვეულებისამებრ მღერიან, დოლებს აბრახუნებენ, ზოგი კი ენერგიას მომავალი შეხვედრისთვის ინახავს. მედია შესასვლელთან ერთ-ერთი არგენტინელი გულშემატკივარი გოგონა სტიუარდს ბილეთს თხოვდა. ეხვეწებოდა იქნებ ერთი მაინც გქონდესო. პასუხად კი მიიღო, რომ ყველა ბილეთი გაყიდულიაო.
მედია ცენტრიდან პრესისთვის განკუთვნილ ტრიბუნაზე ასასვლელი ლიფტითაა. პრესლოჟა დავათვალიერე და სამუშაოდ კარგი პირობებია შექმნილი. თითო მაგიდაზე ორ-ორი ჟურნალისტის ადგილია. ორივეს ცალკე აქვს დენისა და ინტერნეტის წყაროები გამოყოფილი. პლუს მაგიდებზე სანათები და პატარა ეკრანია. ამ უკანასკნელში შეგიძლია ვიდეოგამეორებებს უყურო. მაგიდები ერთმანეთისგან მინის ტიხრითაა გამოყოფილი. მატჩი ბრაზილიის დროით 19 საათზე იწყება და სხვა ჟურნალისტების მსგავსად მოლოდინის რეჟიმში ვარ.

ლაშა თაბაგარი სპეციალურად worldsport.ge-სთვის რიო დე ჟანეიროდან
ავტორის ფოტოები