ფეხბურთის პორტუგალიელი სპეციალისტი ჟოზე მოურინიო ესპანეთის ნაკრების მსოფლიო ჩემპიონატის ჯგუფში ჩარჩენას ეხმაურება და აცხადებს, რომ “ფურია როხას” წარუმატებლობა მოსალოდნელი იყო.
“ხალხი საუკეთესო გუნდების წინააღმდეგ თამაშს სწავლობს. როდესაც ეს საუკეთესო გუნდი მხოლოდ ერთ ფილოსოფიას მისდევს და მის განსაკუთრებულობაში დარწმუნებულია, მეტოქეები, ადრე თუ გვიან, მის წინააღმდეგ თამაშს სწავლობენ.
ჩილემ და ჰოლანდიამ ყურადღება ტაქტიკაზე გაამახვილეს და შედეგად, ესპანეთი გადაუჭრელი პრობლემის წინაშე დადგა. “ფურია როხა” ბოლო 4-6 წლის განმავლობაში ბრწყინვალე იყო. ესპანელები იმდენად კარგად თამაშობდნენ, რომ მათი თამაშის შესწავლა აუცილებელი იყო.
ლუი ვან გაალმა მეტოქის თამაში შესანიშნავად გააანალიზა და ისე იმოქმედა, როგორც საჭირო იყო. სამპაოლიმ კი უფრო მეტს მიაღწია. მიმაჩნია, რომ უნდა ვიყოთ სამართლიანები და ესპანეთის კრიტიკის ნაცვლად ჩილელთა მწვრთნელი შევაქოთ.” – ციტირებს მოურინიოს სიტყვებს Goal-ი.