პორტუგალიის ეროვნული ნაკრების მთავარი მწვრთნელი პაულო ბენტუ, ამერიკის შეერთებული შტატების წინააღმდეგ ფრედ დასრულებული შეხვედრით (2:2) უკმაყოფილოა. პორტუგალიელთა თავკაცის განცხადებით, მისმა გუნდმა განის წინააღმდეგ მაქსიმუმი უნდა გამოავლინოს.
"უდაოდ ცუდი შედეგია. ძალიან რთულ სიტუაციაში ჩავვარდით. ამერიკის წინააღმდეგ მატჩი კარგად დავიწყეთ, თუმცა უპირატესობა ვერ შევინარჩუნეთ და მარცხს ბეწვზე გადავურჩით. ბოლო შეხვედრაში ყველაფერი უნდა გავაკეთოთ, რათა მოვიგოთ. რა თქმა უნდა, გერმანია - აშშ-ს შეხვედრაზეც ბევრია დამოკიდებული, ასე რომ, ძალიან რთულ სიტუაციაში ვართ." _ განაცხადა მატჩის შემდგომ ბენტუმ.
შეგახსენებთ, რომ პირველ ტაიმში პორტუგალიელები ნანის გოლის წყალობით იგებდნენ. მეორე ნახევარში ჯონსმა და დემპსიმ ამერიკა დააწინაურეს და ნაადრევი მერვედფინალის საგზური ჯიბიდან ვარელამ ამოაცალა. კომპენსირებული დროის ბოლო წუთზე, "პორტუს" თავდამსხმელმა კრიშტიანუ რონალდუს გადაცემით, პორტუგალიელებს პლეი ოფის მცირე შანსი დაუტოვა.