მსოფლიოს 2010 წლის ჩემპიონატზე, კამერუნის ეროვნული ნაკრები ჯგუფურ ეტაპზე უქულოდ დარჩა და არაა გამორიცხული, წელსაც სამივე მატჩი დათმოს. საფრთხე დიდია – ფოლკერ ფინკეს გუნდის მეტოქე თვით მასპინძელი ბრაზილიის ეროვნული ნაკრებია.
აფრიკელთა მდგომარეობას ის ამძიმებს, რომ ბრაზილიის ნაკრებს ჯგუფში პირველი ადგილი გარანტირებული არ აქვს და 3 ქულა სჭირდება, რათა პლეი ოფში შედარებით კომფორტულ მდგომარეობაში აღმოჩნდეს. პარალელურად, მექსიკისა და ხორვატიის ნაკრებთა დაპირისპირება დაიწყება და იმ მატჩის შედეგიც გასათვალისწინებელია.
კამერუნისა და ბრაზილიის ნაკრებების ურთიერთშეხვედრების ისტორია 3 მატჩს ითვლის. ერთხელ აფრიკელებმა იმარჯვეს, 2-ჯერ – სამხრეთამერიკელებმა. კამერუნელებისა და ბრაზილიელების უკანასკნელი დაპირისპირება 2003 წელს, კონფედერაციის თასზე შედგა და “ლომებმა” 1:0 იმარჯვეს.
დიდი ალბათობით, კამერუნელებს კვლავ ვერ დაეხმარება გუნდის კაპიტანი სამუელ ეტო’ო, რომელსაც მუხლის ტრავმა აწუხებს. ნახევარდაცვის ხაზის ერთ-ერთი ლიდერი ალექს სონგი დისკვალიფიცირებულია და ფოლკერ ფინკე ვერც მის გამოყენებას შეძლებს.
ბრაზილიის ნაკრების ბანაკში საკადრო პრობლემები არაა. კუნთი აწუხებს თავდამსხმელ ჰალკს, მაგრამ მოედანზე გასვლას მაინც შეძლებს.
მექსიკის ნაკრებთან ფრის (1:1) მიუხედავად, ბრაზილიელებს მატჩის წინ კარგი განწყობა აქვთ და გულშემატკივრებს სანახაობრივ მატჩს ჰპირდებიან. გემახსოვრებათ, კამერუნელები ხორვატებთან განადგურდნენ (0:4) და სავარაუდოდ, კარგი დღე არც ტურნირის მასპინძლებთან ელით. მით უფრო, რომ ბრაზილიელებს მექსიკასთან ფრის შემდეგ რეაბილიტაცია სურთ.
ბრაზილია. “ნასიონალი”.
მექსიკა – ბრაზილია
სავარაუდო შემადგენლობები:
კამერუნი: იტანჯე, ბედიმო, ნოუნკეუ, ნ’კოულოუ, ნიომი, მატიპი, ჩუპო-მოტინგი, ენოჰი, მაკუნი, სალი, ვებო.
მწვრთნელი: ფოლკერ ფინკე
ბრაზილია: ჟულიუ სესარი, დანი ალვესი, დავიდ ლუისი, ტიაგო სილვა, მარსელო, ლუის გუსტავო, პაულინიო, ოსკარი, ნეიმარი, ვილიანი, ფრედი.
მწვრთნელი: ლუიშ ფელიპე სკოლარი
მთავარი არბიტრი: იონას ერიკსონი (შვედეთი)