ბრაზილიის ეროვნული ნაკრების მთავარი მწვრთნელი ლუიშ ფელიპე სკოლარი, ლუის ვან გაალის განცხადებას გამოეხმაურა და აღნიშნა, რომ თუ ვინმეს ჰგონია "სელესაო" მოწინააღმდეგეს აირჩევს სულელი ყოფილა. ბრაზილიელთა თავკაცი გაგულისებულია გავრცელებული მოსაზრების შესახებ, რომლის თანახმადაც, "სელესაო" ჰოლანდიის და ჩილეს მატჩის შედეგის მიხედვით, კამერუნთან შესაბამისად ითამაშებს.
"ჩვენ უნდა მოვიგოთ. თუ ვინმეს ჰგონია, რომ ბრაზილია მოწინააღმდეგეს აირჩევს და ისე ითამაშებს, სულელი ყოფილა. ფიფამ ასეთი განრიგი აირჩია და ეს ჩვენზე გავლენას არ ახდენს. გავრცელებულმა მოსაზრებამ რთულ სიტუაციაში ჩაგვაგდო და ეს ფაქტი კამერუნის უპატივცემულობაცაა. მოწინააღმდეგეს არასდროს ვირჩევ და ყოველთვის მოსაგებად ვიბრძვით." _ განაცხადა სკოლარიმ.
ბრაზილიელთა თავკაცმა შემადგენლობაზეც გააკეთა კომენტარი.
" გუნდის შეცვლას არ ვაპირებ. ვენდობი სასტარტო შემადგენლობას, რომელიც ხორვატიასთან დავაყენე. ფრედს და პაულინიოს ვენდობი, ასე რომ პირველი შეხვედრის მსგავსად, აღნიშნული სასტარტო შემადგენლობით თამაშს ვაგრძელებ. პაულინიოს ნება უნდა მივცეთ გაიზარდოს, როგორც ფეხბურთელი. შეიძლება, იგი საუკეთესო მატჩებს არ ატარებს, თუმცა მას ბოლომდე ვენდობი."