ურუგვაისა და იტალიის ეროვნულ ნაკრებთა მატჩში (0:1), სამხრეთამერიკელთა ფორვარდმა ლუის სუარესმა “სკუადრა აძურას” მცველ ჯორჯო კიელინის მხარზე უკბინა, რასაც დიდი გამოხმაურება მოჰყვა. მომხდარზე კომენტარი თავად კიელინიმაც გააკეთა.
“რაც მოხდა, სამარცხვინოა. ჩვენი ბედი მსაჯმა გადაწყვიტა. მომდევნო ეტაპზე იტალია უნდა გასულიყო. მარკიზიოს გაძევება და სუარესის დაუსჯელობა მატჩის მთავარი ეპიზოდები იყო. თამაშს ვაკონტროლებდით და ურუგვაი ვერაფერს ახერხებდა. ცხადი იყო, რომ რიცხვობრივ უმცირესობაში თამაში გვიჭირდა. საბოლოოდ, ურუგვაელებმა დაგვსაჯეს და გოლი სტანდარტიდან გაგვიტანეს.
სუარესი ნამდვილი ლაჩარია. ეს პირველი შემთხვევა არაა, როცა ლუისი არასპორტულად იქცევა და დაუსჯელი რჩება. მსაჯმა კბენის მომენტი კარგად დაინახა, მაგრამ რეაქცია არ ჰქონია”, - განუცხადა კიელინიმ იტალიურ მედიას.