ჰოლანდიის, კოლუმბიის და არგენტინის ნაკრებთა კვალად, ბელგია მეოთხე გუნდი გახდა, რომელმაც მსოფლიოს ჩემპიონატის ჯგუფური ეტაპი დანაკლისის გარეშე განვლო. მარკ ვილმოტსის შეგირდებმა ალჟირის და რუსეთის შემდეგ, სამხრეთ კორეასაც სძლიეს და 9 ქულით H ჯგუფში პირველობა არავის დაუთმეს.
აღსანიშნავია, რომ ბელგიელებს ძირითად შემადგენლობაში რამდენიმე წამყვანი ფეხბურთელი (კომპანი, ვერმაელენი, აზარი, ლუკაკუ...) არ ჰყოლიათ, ყველაფერს კი ისიც დაემატა, რომ პირველი ტაიმის მიწურულს დეფური გააძევეს (“პორტუს” ნახევარმცველიშინ-ვოოკ კიმზე გაშლილი ფეხით წავიდა), თუმცა, ევროპელთათვის მიზნის მიღწევაში ხელი არც ამას შეუშლია.
ბელგიელებმა გამარჯვების მომტანი გოლი 78-ე წუთზე შეაგდეს, თამაშის გმირი კი იან ვერტონგენი გახდა. შეტევაში ჩართულმა მცველმა გადმოვარდნილ ბურთზე ყველას დაასწრო და სეუნგ-გიუ კიმს დაბალ კუთხეში აუღებელი დაურტყა. ამ დროს თავდაპირველად, შეცვლაზე შესული ორიგი უტევდა, დამატებაზე კი კორეელ მცველებს “ჩამოეძინათ”.
საბოლოოდ, ისე გამოვიდა, რომ ბელგიელებმა სამივე გასულ მატჩში გამარჯვების მომტანი გოლები დასკვნით 15 წუთში გაიტანეს. არადა, აზიელებს ამ თამაშში დამარცხება ნამდვილად არ დაუმსახურებიათ. მათ რამდენიმე რეალური მომენტი ჰქონდათ, ერთხელ კი, როდესაც კურტუას კარს ჰეუნგ-მინ სონი უტევდა, ბურთი ხარიხამ აისხლიტა.
მერვედფინალში ბელგიის ნაკრების მეტოქე აშშ-ს ეროვნული გუნდი იქნება.

სან პაულუ. ”არენა სან პაულუ”. 61397 მაყურებელი
სამხრეთ კორეა – ბელგია 0:1 (0:0)
სამხრეთ კორეა: სეუნგ-გიუ კიმი, ჯეონგ-ჰო ჰონგი, იონგ ლი, სუკ-იუნგ იუნი, იუნგ-გვონ კიმი, სუნგ-იუენგ კი, ჰეუნგ-მინ სონი (დონგ-ვონ ჯი, 73), კოოკ-იუნგ ჰანი (კეუნ-ჰო ლი, 46), ჩუნგ-იონგ ლი, ჯა-ჩეოლ კოო, შინ-ვოოკ კიმი (ბო-კიუნგ კიმი, 66).
მწვრთნელი: მიუნგ-ბო ჰონგი.
ბელგია: კურტუა, ვან ბუიტენი, ვერტონგენი, ლომბარტსი, ვანდენ ბორე, ფელაინი, დემბელე, დეფური, მერტენსი (ორიგი, 60), მირალაში (აზარი, 88), ჯანუზაი (ჩადლი, 60).
მწვრთნელი: მარკ ვილმოტსი.
გოლი: ვერტონგენი (78).
გაფრთხილება: ჰონგი (35), დემბელე (50).
გაძევება: დეფური (45).
მსაჯი: უილიამსი (ავსტრალია).
ბურთის ფლობა: 51%-49%, დარტყმა: 13 (6)-14 (8), ჯარიმა: 16-11, კუთხური: 7-4, თამაშგარე: 1-4.