რუსეთის ეროვნული ნაკრების მთავარმა მწვრთნელმა ფაბიო კაპელომ, ალჟირთან (1:1) მუნდიალის ჯგუფური ეტაპის ბოლო მატჩის შემდეგ, მისი გუნდის წარუმატებლობის მიზეზად მსაჯები დაასახელა.
"არ მიყვარს მსაჯებზე საუბარი, მაგრამ ისინი ყოველთვის რუსების წინააღმდეგ არიან. დღევანდელი მატჩის შედეგი მსაჯების ბრალია. ჩვენ ერთი გოლი გავიტანეთ და არ ჩათვალეს, კოზლოვს ყვითელი ბარათი დაუმსახურებლად მისცეს. სანამ გოლს გავუშვებდით, აკინფეევს 10 წამის განმავლობაში ტრიბუნიდან თვალში ლაზერს ანათებდნენ და ამის ვიდეოც გვაქვს." - განაცხადა კაპელომ.
იტალიელ სპეციალისტს რუსეთის ნაკრებში დარჩენა-არდარჩენის საკითხზეც ჰკითხეს:
"ყველა შედეგს ჩემ თავზე ვიღებ. რუსეთის ეროვნულ ნაკრებში მუშაობას გავაგრძელებ, თუ ფედერაცია ჩემთან თანამშრომლობას მოისურვებს. ჩემი ხელმძღვანელობით რუსეთი, 2002 წლის შემდეგ, მუნდიალზე პირველად მოხვდა."
შეგახსენებთ, რომ ფაბიო კაპელოს წლიური ანაზღაურება 6.6 მილიონი გირვანქაა და ამ მაჩვენებლით, იტალიელი სპეციალისტი, მიმდინარე მსოფლიო ჩემპიონატზე ყველაზე მაღალანაზღაურებადი მწვრთნელია.