ბრაზილიაში მიმდინარე მსოფლიო ჩემპიონატის 1/8-ფინალში, კოლუმბიისა და ურუგვაის მატჩამდე ერთი დღით ადრე, სტადიონ “მარაკანაზე ოფიციალურ პრესკონფერენციას პირველი კოლუმბიელები გამართავენ.
ბრაზილიის დროით 14:30 საათზე, ჟურნალისტებს გუნდის მთავარი მწვრთნელი ხოსე პეკერმანი და მეკარე დავიდ ოსპინა შეხვდებიან. პრესკონფერენციის მერე, გუნდი “მარაკანაზე” ოფიციალურ ვარჯიშს არ გამართავს, არამედ, სტადიონ “საო ჟანუარიოს” მიაშურებს, სადაც 16 საათიდან 17:30 საათამდე დაჰყოფს.
ურუგვაის მთავარი მწვრთნელი ოსკარ ტაბარესი “მარაკანაზე” პრესკონფერენციას ბრაზილიის დროით 17:30 საათზე ჩაატარებს. ჯერჯერობით უცნობია მასთან ერთად რომელი ფეხბურთელი იქნება. კოლუმბიელების მსგავსად, “მარაკანაზე” არც ურუგვაელები ივარჯიშებენ. ისინიც “საო ჟანუარიოს” მიაშურებენ, სადაც 18:45 საათიდან 20 საათამდე დარჩებიან.
გაზეთ “მსოფლიო სპორტისა” და საინფორმაციო სააგენტო worldsport.ge-ს სპეციალურმა კორესპონდენტმა კოლუმბია-ურუგვაის მატჩის მედია ბილეთი მიიღო და ბრაზილიის დროით 17 საათიდან დაპირისპირებას უშუალოდ “მარაკანადან” ადევნებს თვალს.


ლაშა თაბაგარი worldsport.ge-ს სპეციალური კორესპონდენტი რიო დე ჟანეიროდან