ალჟირის ფეხბურთის ფედერაცია უარყოფს გავრცელებულ ინფორმაცია, რომლის თანახმადაც, გუნდის მთავარმა მწვრთნელმა, ვაჰიდ ჰალილჰოჯიჩმა ფეხბურთელებს რამადანის დროს მარხულობა აუკრძალა.
რამადანი დღეს, 29 ივნისს დაიწყო. 27 ივლისამდე, მუსლიმები, მზის ამოსვლიდან მის ჩასვლამდე, ყოველგვარს საკვებსა და სასმელზე უარს ამბობენ. ბუნებრივია, ასეთი რეჟიმი ფეხბურთელების მომზადებაზე გავლენას მოახდენს და გავრცელდა ინფორმაცია, თითქოს ჰალილჰოჯიჩმა ფეხბურთელებს მარხულობა აუკრძალა, მაგრამ როგორც ირკვევა, ეს ინფორმაცია სიმართლეს არ შეესაბამება.
“გავრცელებულ ინფორმაციას უარვყოფთ. მწვრთნელს ფეხბურთელებისთვის მარხვის იგნორირება არასდროს მოუთხოვია. ჰალილჰოჯიჩი ისლამს პატივს ცემს.” – ვკითხულობთ ალჟირის ფეხბურთის ფედერაციის განცხადებაში.
შეგახსენებთ, რომ ალჟირის ნაკრები, მსოფლიოს ჩემპიონატის 1/8-ფინალში, 30 ივნისს, გერმანიის წინააღმდეგ ითამაშებს.