არგენტინის ეროვნული ნაკრების მთავარი მწვრთნელის ალეხანდრო საბელიას განცხადებით, შვეიცარიასთან დამატებით დროში მოგებულ მატჩს (1:0), "ალბისელესტე" იმსახურებდა.

"ვფიქრობ, გამარჯვებას ძირითად დროშივე ვიმსახურებდით. პირველ ტაიმში მეტოქეს ორი მომენტი ჰქონდა, თუმცა მეორე ნახევარში ჩვენ გოლის გატანის 5 ან 6 აშკარა შანსი გვქონდა. გამარჯვება დავიმსახურეთ. ვულოცავ ჩემ გუნდს, ფეხბურთელებმა წონასწორობა არ დაკარგეს და მოიგეს კიდეც. ზოგადად თვითკრიტიკული ადამიანი ვარ, მაგრამ განვლილ მატჩში გუნდმა მოედნის ყველა ნაწილში ძალიან კარგად ითამაშა. შვეიცარიასთან მატჩი ჩემ კარიერაში ყველაზე დაძაბული შეხვედრა იყო. უკვე პენალტების სერია ახლოვდებოდა და წამების გასვლა ყურში მუსიკალურად ჩამესმოდა, თუმცა ყველაფერი ჩვენ სასიკეთოდ გადაწყდა." _ განაცხადა საბელიამ

შეგახსენებთ, რომ არგენტინის ეროვნული ნაკრები მუნდიალის მეოთხედფინალურ დაპირისპირებაში ბელგიას 6 ივლისს დაუპირისპირდება.