ბრაზილიის ნაკრების ლიდერ ნეიმარის აზრით, თანამედროვე ფეხბურთში საქმისადმი პრაგმატულად მიდგომა ყველაზე მომგებიანია. “ბარსელონას” ფორვარდმა ჟურნალისტებს უთხრა, რომ ბრაზილია მიმდინარე მუნდიალზე მხოლოდ გამარჯვებაზე ფიქრობს და არ ცდილობს შოუს დადგმას.

“არანაირ შოუს მოწყობაზე არ ვფიქრობ. ეს არც ჩემს და არც მთლიანად გუნდის გეგმებში არ შედის. ტურნირზე წარმატების მისაღწევად გამოვდივართ და არა გასართობად. 4 და 5-ბურთიანი უპირატესობით მოგება მშვენიერია, მაგრამ ყველა თამაშის ასეთი შედეგით დასრულება შეუძლებელია. ამჟამინდელი ფეხბურთი ადრინდელზე ბევრად რთულია, რადგან საერთო დონე შედარებით გათანაბრდა. იმარჯვებს ის, ვინც კონკრეტულ შეხვედრაში უფრო მობილიზებულია” – ციტირებს L’Equipe ნეიმარის სიტყვებს.