არგენტინის ეროვნული ნაკრების მთავარი მწვრთნელი ალეხანდრო საბელია ბელგიის წინააღმდეგ გასამართ მატჩამდე აცხადებს, რომ "ალბისელესტე" მხოლოდ ლიონელ მესიზე არაა დამოკიდებული და გუნდურ თამაშს ხაზს უსვამს.

"ბარსელონაშიც" და არგენტინის ნაკრებში გუნდი, შესაძლოა, გარკვეულწილად მესიზეა დამოკიდებული, მაგრამ იგი ნაკრების წევრია და სხვა ფეხბურთელების გარეშე ვერაფერს გახდება. რა თქმა უნდა, მესი მსოფლიოში საუკეთესოა. თქვენ ნახეთ რამდენიმე დღის წინ, პალასიოს მეტოქესთან ბრძოლა, რომ არ მოეგო და მესისთვის კარგი პასი არ მიეცა, შეიძლება, მოვლენები სხვანაირად განვითარებულიყო. 4 წლის წინ, მესის აკრიტიკებდნენ, თუმცა ახლა ყველა ამბობს, რომ ნაკრები მასზეა დამოკიდებული." - განაცხადა საბელიამ.

არგენტინელთა თავკაცმა მომავალ მატჩისთვის სასტარტო შემადგენლობაზე საუბარი იუარა და განაცხადა, რომ ეს მისი და ფეხბურთელების გადასაწყვეტია. შეგახსენებთ, რომ დღეს, თბილისის დროით 20:00 საათზე არგენტინის და ბელგიის ეროვნული ნაკრებები კიდევ ერთი ნახევარფინალისტის ვინაობას გაარკვევენ.