ბელგიის ეროვნული ნაკრების მთავარ მწვრთნელ მარკ ვილმოტსს, არგენტინის წინააღმდეგ წაგებულ მატჩში არავინ დაუდანაშაულებია და მისი გუნდის ასპარეზობაში პოზიტიურს ხედავს.

მართალია მატჩის წინ, ბელგიელმა სპეციალისტმა განაცხადა, რომ ბრაზილიაში მეოთხედფინალზე შეჩერებას არ აპირებდა, თუმცა საბელიას გუნდმა ბენილუქსელები მაინც შინ გაისტუმრა.

"სწრაფი გოლი გავუშვით და შემდეგ მატჩის ჩვენთვის სასიკეთოდ შემობრუნება ვეღარ შვძელით. გოლის გატანის რამდენიმე შესაძლებლობაც გვქონდა, თუმცა ჰაერს გავატანეთ. რა თქმა უნდა, ძალიან იმედგაცრუებული ვარ, თუმცა ჩემი გუნდის ასპარეზობაში პოზიტივს ვხედავ და მიმაჩნია, სამომავლოდ დიდებული გუნდი მეყოლება." _ განაცხადა ვილმოტსმა.

ბელგიელს საამაყოდ საქმე მართლაც უნდა ჰქონდეს. 12-წლიანი პაუზის შემდეგ, ნაკრები მუნდიალის ფინალურ სტადიაზე გაიყვანა და შემდეგ მეოთხედფინალშიც ათამაშა. მსოფლიო ჩემპიონატზე ბენილუქსელთა ნაკრების ასპარეზობის გათვალისწინებით, საფრანგეთში გასამართ 2016 წლის ევროპის ჩემპიონატისთვის ბელგია ერთ-ერთი მოწინავე გუნდი იქნება.