არგენტინის ეროვნული ნაკრების ბანაკში მოლოდინი მართლაც დიდია – 24-წლიანი პაუზის შემდეგ, “ალბისელესტე” მსოფლიოს ჩემპიონატის 1/2-ფინალშია გასული და ყველა ღონეს იხმარს იმისთვის, რომ 13 ივლისს, “მარაკანაზე” ითამაშოს. თავის მხრივ, მოტივაცია ჰოლანდიის ეროვნულ ნაკრებსაც დიდი აქვს – “ნარინჯისფერებმა” უკანასკნელი მუნდიალის ფინალი ესპანელებთან დათმეს და “ოქროს თასამდე” ნაბიჯიღა დააკლდათ.

არგენტინისა და ჰოლანდიის ეროვნულ ნაკრებთა დაპირისპირება შეგვიძლია მსოფლიო ფეხბურთის კლასიკად ჩავთვალოთ. ევროპულ-სამხრეთამერიკული გრანდების დაპირისპირება ყოველთვის საინტერესოა და უდავოა, გამონაკლისი არც ეს მატჩი იქნება. არგენტინელები და ჰოლანდიელები ერთმანეთს 6-ჯერ შეხვედრიან – 3-ჯერ ევროპელებმა მოიგეს, 2 მატჩი ფრედ დასრულდა, ერთხელ კი, არგენტინელებმა იმარჯვეს. “ალბისელესტეს” ეს გამარჯვება მართლაც ისტორიულია – მსოფლიოს 1978 წლის ჩემპიონატის ფინალში, მარიო კემპესის მეთაურობით, არგენტინელებმა 3:1 მოიგეს და ოქროს მედლები დაისაკუთრეს. ამ ნაკრებთა უკანასკნელი ჯახიც მუნდიალზე შედგა – 2006 წელს, ჰოლანდიელებმა და არგენტინელებმა ჯგუფურ ეტაპზე ითამაშეს და უგოლოდ გაიყარნენ.

მსოფლიოს 2014 წლის ჩემპიონატის 1/2-ფინალურ დაპირისპირებას ორივე გუნდი დანაკლისითYხვდება. ჰოლანდიელთა პრობლემა ნახევარდაცვის ხაზია. ტრავმა აქვს ნაიჯელ დე იონგს და საეჭვოა ლეროი ფერის თამაშიც. დიდი ალბათობით, ლუის ვან გაალის გუნდს ვერც უკანახაზელი რონ ვლარი დაეხმარება.

არგენტინელთა ერთადერთი და მნიშვნელოვანი დანაკლისი ანხელ დი მარიაა, რომელიც ბელგიასთან 1/4-ფინალურ მატჩში (1:0) დაშავდა და მოედანი იძულებით დატოვა. “ალბისელესტეს” სამედიცინო შტაბს ჯერ კიდევ აქვს იმედი იმისა, რომ დი მარია ფინალში გასვლის შემთხვევაში მოედანზე გავა. ალეხანდრო საბელიას გუნდში კარგი ამბებიცაა – სერხიო აგუერომ ტრავმა მოიშუშა და გუნდთან ერთად სრული დატვირთვით ვარჯიშობს. ჟურნალისტების ვარაუდით, “მანჩესტერ სიტის” ფორვარდი ჰოლანდიასთან სასტარტო შემადგენლობაში გამოჩნდება. დისკვალიფიკაცია მოიხადა მცველმა მარკოს როხომ, რომელიც კვლავ დაცვის მარცხენა ფრთას დაუბრუნდება.

მატჩის მთავარი არბიტრი თურქი ჯუნეით ჩაქირი იქნება, რომელიც მიმდინარე მუნდიალზე თავის მე-3 შეხვედრას გაუძღვება. აქამდე, ჩაქირიმ ბრაზილია-მექსიკისა და რუსეთი-ალჟირის მატჩებში იმსაჯა.

ჰოლანდიისა და არგენტინის ნაკრებთა დაპირისპირება ოთხშაბათს, თბილისის დროით 23:50-ზე დაიწყება.

9 ივლისი. სან პაულუ. “კორინთიანს არენა”.

ჰოლანდია – არგენტინა

სავარაუდო შემადგენლობები:

ჰოლანდია: სილესენი, ვრაი, ვლარი, ინდი, ბლინდი, ვაინალდუმი, დე გუზმანი, კუიტი, სნეიდერი, რობენი, ვან პერსი.

მწვრთნელი: ლუის ვან გალი

არგენტინა: რომერო, საბალეტა, გარაი, დემიკელისი, როხო, პერესი, მასკერანო, გაგო, მესი, აგუერო, იგუაინი.

მწვრთნელი: ალეხანდრო საბელია

მთავარი არბიტრი: ჯუნეით ჩაქირი