სამშაბათს ჰოლანდიის ეროვნულმა ნაკრებმა სან პაულუს “პაკაემბუს” სტადიონზე არგენტინასთან ნახევარფინალის წინ ივარჯიშა. წვრთნის დიდი ნაწილი ჟურნალისტებისთვის დახურული იყო, ვარჯიშის დასრულების შემდეგ კი “ნარინჯისფერთა” თავკაცი ლუის ვან გაალი მასმედიელებს გაესაუბრა.

- პირველ კითხვას ვან პერსის მდგომარეობაზე დაგისვამთ. შეძლებს კაპიტანი არგენტინელთა წინააღმდეგ თამაშს?

- ვან პერსის მოწამვლის პრობლემა აქვს, ამიტომაც მატჩის წინა დღეს არ უვარჯიშია. იმედია, შეხვედრის წინ მწყობრში ჩადგება. რობინი ბრწყინვალე ფორმაშია.

- მთლიანობაში გუნდის ფიზიკური მდგომარეობით კმაყოფილი ხართ?

- კოსტა რიკის მატჩის შემდეგ 2 დღის განმავლობაში ბიჭები დაღლილები ჩანდნენ. ამიტომაც შედარებით ნაკლები დატვირთვების ვარჯიშს ვატარებდით. ჩემი რწმენით, პროფესიონალმა ფეხბურთელმა მომქანცველი ორთაბრძოლიდან 3 დღეში ენერგიის სრულად აღდგენა უნდა შეძლოს. ჩვენ შემთხვევაში ასეც მოხდა და ამიტომაც ბოლო წვრთნა მაქსიმალური ინტენსივობით ჩავატარეთ.

- როგორ გგონიათ, მომავალ ნახევარფინალში ფავორიტი არგენტინაა თუ თქვენი გუნდი?

- არცერთი. ყველა გუნდი, რომელიც მსოფლიოს პირველობის ნახევარფინალში გავა, თამამად შეიძლება მუნდიალის ფავორიტად ჩაითვალოს.

- ლეო მესის განეიტრალებას რა მეთოდით აპირებთ?

- ჰოლანდიის ნაკრები არგენტინის წინააღმდეგ ითამაშებს და არა მესის. გეგმას რაც შეეხება, იგი მთლიანობაშია შემუშავებული და არა კონკრეტულად რომელიმე ფეხბურთელის წინააღმდეგ. მომავალი ნახევარფინალის წინ საკუთარ მოთამაშეებზე ვფიქრობ და არა მოწინააღმდეგის წევრებზე. მთავარია, ჰოლანდიის ნაკრების ფეხბურთელებმა შესაძლებლობები მეტ-ნაკლებად სრულად გამოავლინონ.

- მეკარის საკითხი გადაწყვეტილია?

- ჩემი აზრით, სილესენი მინდობილ საქმეს კარგად უძღვება. ჩემ წინაშე არჩევნის სირთულე არ დგას, თუმცა, ცხადია, ერთთვიანი ტურნირის მსვლელობისას ცვლილებები განსახორციელებელია.