დასრულდა 2014 წლის რიგით მე-20 მსოფლიო ჩემპიონატი და აღნიშნულ ტურნირზე ნომინაციებში გამარჯვებულებიც ცნობილნი გახდნენ.

ოქროს ბურთის ფლობაში არგენტინელი ფეხბურთელები დაწინაურდნენ. ბრაზილიაში გამართულ მსოფლიო ჩემპიონატზე საუკეთესო ფეხბურთელად ლიონელ მესი დაასახელეს. "ალბისელესტეს" თავდამსხმელმა აღნიშნული ჯილდო პირველად მიიღო და სახეზე ემოცია არ ჰქონდა _ გასაგებია, მესიმ სანუკვარი ტიტული ვერ მოიპოვა. მსოფლიოს ოთხგზის საუკეთესო ფეხბურთელი რიგით მესამე არგენტინელია, რომელიც მუნდიალზე საუკეთესო ფეხბურთელი გახდა. მანამდე აღნიშნული აღიარება მარიო კემპესმა (1978) და დიეგო მარადონამ (1986) მოიპოვეს.

მეორე ადგილზე ტომას მიულერი გავიდა, ხოლო მესამეზე - არიენ რობენი.

შეგახსენებთ, რომ მსოფლიო ჩემპიონატზე საუკეთესო ფეხბურთელს ფიფა 1978 წლიდან ავლენს. ბრაზილიელები ორჯერ გამხდარან მუნდიალზე საუკეთესონი: 1994 წელს - რომარიო, 1998 წელს - რონალდო. იტალიელებმაც სამხრეთ ამერიკელების მსგავსად ორჯერ მოიპოვეს აღნიშნული ტიტული: 1982 წელს - პაოლო როსიმ და 1990 - სალვატორე სკილაჩიმ. გერმანელმა, ფრანგმა და ურუგვაელმა ფეხბურთელებმა: ოლივერ კანმა, ზინედინ ზიდანმა და დიეგო ფორლანმა შესაბამისად, 2002, 2006 და 2010-ში თითოჯერ იპირველეს.

2014 წლის მსოფლიო ჩემპიონატის საუკეთესო მეკარე მანუელ ნოიერი გახდა. ოქროს ბუცი კოლუმბიელ ხამეს როდრიგესს გადაეცა. ახალგაზრდა 23 წლის ფეხბურთელმა 6 გოლი გაიტანა. აღსანიშნავია, რომ "მონაკოს" შემტევმა მუნდიალზე მხოლოდ ხუთი მატჩი ჩაატარა და ბომბარდირთა დავაში ტომას მიულერი (5) და ნეიმარი (4) ჩამოიტოვა.

როდრიგესის გარდა კოლუმბიამ ფეარ პლეის პრინციპების დაცვისთვის საუკეთესო ნაკრების წოდებაც მიიღო. ტურნირის საუკეთესო ახალგაზრდა ფეხბურთელი 21 წლის ფრანგი პაულ პოგბა გახდა.