გუშინ, დღეს, ხვალ და ვინ იცის, კიდევ რამდენი ხანი, ფეხბურთზე საუბრისას ყველაზე ხშირად ისლანდიას ახსენებენ. ქვეყანა, სადაც 355 000 ადამიანი ცხოვრობს, მსოფლიოს აოცებს. ჯერ იყო, შესარჩევ ციკლში ჰოლანდია ჩატოვა, თანაც ორივე თამაში მოუგო, მერე საფრანგეთში ჯგუფიდან გავიდა და ფეხბურთის სამშობლო ინგლისს 2:1 მოუგო, რითაც მეოთხედფინალში გაიკვლია გზა.

ისლანდიას საქართველოს ეროვნული ნაკრები ერთხელ შეხვედრია, შვიდი წლის წინ ამხანაგურში 1:3 წავაგეთ და მაშინ ლადო დვალიშვილმა გაიტანა. ექტორ კუპერი იყო ქართველთა მწვრთნელი.

... ისლანდიის თამაში პირველად 1986 წელს ვნახე. ევროპის შესარჩევი იყო რეიკიავიკში, საბჭოთა კავშირს ხვდებოდნენ და მახსოვს, ძალიან გაუჭირდა ვალერი ლობანოვსკის გუნდს.

ლამაზად ის დამამახსოვრდა, რომ ქართველმა გაიტანა გოლი: თენგიზ სულაქველიძემ შორიდან ყუმბარასავით გაუშვა... ეს გამთანაბრებელი გოლი იყო, მანამდე კი, აბა მაშინ ვინ იცოდა და ისლანდიის ყველა დროის უცნობილესი ფეხბურთელის მამას გაუტანია: იმხანად 8 წლის ეიდურ გუდიონსენის მამას, არნორ გუდიონსენს.

მერე ისე მოხდა, რომ მამა-შვილმა ნაკრებში ერთად ითამაშეს, რაც უნიკალური, ერთადერთი შემთხვევაა ფეხბურთის ისტორიაში.