ევროპის 2016 წლის გამარჯვებული პორტუგალიის ეროვნული ნაკრები სამშობლოში დაბრუნდა. ლისაბონის აეროპორტში ჩასვლის შემდეგ ფეხბურთელები სპეციალურად მათთვის მომზადებულ ავტობუსში ჩასხდნენ და ქალაქის ქუჩებში საზეიმო მსვლელობა დაიწყო.

პორტუგალიის ნაკრებმა საფრანგეთში გამართული ევროპის ჩემპიონატის ფინალურ მატჩში, 10 ივლისს, ტურნირის მასპინძელთა ნაკრები დამატებით დროში გატანილი გოლით 1:0 დაამარცხა და არსებობის ისტორიაში პირველად მოიგო კონტინენტის პირველობა.