მსოფლიო ფეხბურთის მმართველი ორგანიზაცია (FIFA) მზადაა კატალონიის "ბარსელონას" ტრავმირებული ნეიმარისთვის 238 000 ევრო გადაუხადოს. მას შემდეგ, რაც კოლუმბიელმა ზუნიგამ ბრაზილიელ ვარსკვლავს ზურგში მძიმე დარტყმით ხერხემლის მესამე მალა დაუზიანა, ბრაზილიელი ექიმების განცხადებით, ნეიმარი 45 დღე იუქმებს.

FIFA-ს წესდებაში ჩადებული ერთი პუნქტის თანახმად: თუ მის მიერ ორგანიზებულ ტურნირში ფეხბურთელი ტრავმას მიიღებს და კლუბს 28 დღეზე მეტხანს ვერ დაუბრუნდება, FIFA ვალდებულია შესაბამის საფეხბურთო კლუბს გადაცილებულ დღეებზე კომპენსაციის სახით თანხა გადაუხადოს.

FIFA "ბარსელონას" ნეიმარის ხელფასის ასანაზღაურებლად დღეში 13 972 ევროს გადაუხდის და კატალონიელები საერთო ჯამში 238 000 ევროს მიიღებენ. კომპენსაციის გადახდის ათვლის დღე 2 აგვისტო იქნება. როდესაც ფეხბურთელი გამოჯანმრთელებას შეძლებს და მოედანს დაუბრუნდება, FIFA "ბარსელონასთვის” ფულის გადახდას შეწყვეტს.